Wiki chache zilizopita mwanamuziki kutoka Tandale, Naseeb Abdul ‘Diamond Platnumz’, alikuwa katika dunia nyingine akizungumza vitu tofauti kuhusu muziki kwa maana ya kushiriki katika tuzo za muziki za MTV MAMA.
Katika tuzo hizo mwakilishi pekee wa Tanzania Diamond hakuondoka na kitu na badala yake bendera ya Nigeria ikapeperushwa vyema ambapo tuzo ya Msanii bora wa mwaka na Msanii bora wa kiume alizochukua Davido, tuzo ya msanii bora wa kike ikienda kwa mwanadada Tiwa Savage, tuzo ya Mtayarishaji bora Video Clarence Peters aliyetengeneza video ya ‘My Number One Remix’.
Kama hiyo haitoshi mwishoni mwa wiki iliyopita msanii huyo wa miondoko ya Bongofleva alikutana na wasanii wakali wa duniani katika tukio la utoaji tuzo kubwa za muziki Barani Afrika zilizoandaliwa na Black Entertainment Television (BET), tukio hilo lilijiri kwenye Ukumbi wa Nokia Theatre jijini Los Angeles, Marekani, ambapo Diamond alikuwa ameteuliwa kuwania Kipengele cha Mwanamuziki Bora kutoka Afrika akiwa sambamba na mwanamuziki Davido (Nigeria), Mafikizolo (Afrika Kusini), Tiwa Savage (Nigeria), Toofan (Togo) na Sarkodie (Ghana).
Kwa bahati mbaya pia katika tuzo hizo Davido kamwangusha tena Diamond, baada ya kupata tuzo ya msanii bora wa Afika.
Mengi yamesemwa kuhusu hili ikiwamo madai kuwa kura za mashabiki hazikutosha kutokana na Nigeria kuwa na watu zaidi ya 300 milioni huku Tanzania ikiwa na zaidi ya 40 milioni, hivyo mashabiki wa Davido wakipiga kura robo tu watakuwa wengi kushinda hata wa Tanzania wakipiga wote.
Starehe limechambua sababu ambazo inabidi Diamond azifanyie kazi kwani hizo pekee ndiyo zimemfanya ashindwe kupambana na Davido.
Diamond muziki mmoja Davido zaidi ya 10
Katika suala la muziki wasanii hawa wana tofauti kubwa ambapo muziki wa Diamond unaotambulika Afrika nzima ni mmoja, ambao kwa bahati nzuri au mbaya ameshirikiana na Diamond ‘My Number One Remix’. Licha ya muziki huo kufanya vizuri jukwaani hata mtayarishaji wa video ya wimbo huo Clarence Peters alipata tuzo ya MTV MAMA, kwa namna moja ama nyingine umezidi kumpaisha Davido, kwa maana ya kuzidi kutambulika Afrika na duniani kwa ujumla.
Majaji wa BET (Academy) hawamtambui Diamond
Kilichomuangusha mkali Dimond pia ni jopo la majaji wa tuzo za BET kama siyo na MTV MAMA, hawakuwa wakimtambua kama wanavyomtambua Davido. Davido ameanza siku nyingi kufanya muziki na umekuwa ukisikika Kimataifa, hivyo inakuwa rahisi hata wanapokaa kuchagua kumpendekeza kuliko kumpendekeza kijana kutoka Tandale. Jopo hilo linaundwa na wadau wa muziki na wamekuwa wakisikia na kuona muziki wa Davido kwenye vituo mbalimbali vya matangazo, lakini wameanza kuona kazi ya Diamond akishirikiana na msanii huyo mapema mwanzoni mwa mwaka huu.
Kwa kuwa wanamfahamu ni rahisi kumfuatilia yeye kuliko Diamond ambaye ni mtu mpya kwao
